یوم استحصال پر پاکستانی عسکری قیادت کی کشمیریوں سے اظہار یکجہتی

پاکستان کی عسکری قیادت نے یومِ استحصال کے موقع پر کشمیری عوام کے ساتھ غیر متزلزل یکجہتی کا اعادہ کیا ہے۔

انٹر سروسز پبلک ریلیشنز (آئی ایس پی آر) کی جانب سے جاری کردہ ایک بیان میں چیئرمین جوائنٹ چیفس آف اسٹاف کمیٹی اور سروسز چیفس نے مقبوضہ کشمیر کے شہداء کو خراج تحسین پیش کیا اور کشمیریوں کے حق خودارادیت کے لیے ان کی جائز جدوجہد کی مکمل حمایت کا اعادہ کیا۔

بیان میں بھارت کے زیر قبضہ جموں و کشمیر میں بھارتی قبضے اور انسانی حقوق کی خلاف ورزیوں پر شدید تشویش کا اظہار کیا گیا۔ اس میں کہا گیا کہ بھارت کی جانب سے خطے کی آبادی کو تبدیل کرنے کی کوششیں علاقائی امن کے لیے خطرہ ہیں۔

آئی ایس پی آر نے مزید کہا کہ جنوبی ایشیا میں پائیدار امن کا انحصار مسئلہ کشمیر کے منصفانہ حل پر ہے جو کشمیری عوام کی امنگوں اور اقوام متحدہ کی متعلقہ قراردادوں کے مطابق ہو۔ بیان میں کہا گیا کہ مسلح افواج اور پاکستانی عوام اپنی جدوجہد میں کشمیریوں کے شانہ بشانہ کھڑے ہیں۔