مریم نواز نے پنک سالٹ لون اسکیم کا آغاز کر دیا، پہلے چیک تقسیم

وزیر اعلیٰ پنجاب مریم نواز نے صوبے کی پہلی پنک سالٹ ویلیو ایڈیشن فنانسنگ اسکیم کا باقاعدہ آغاز کرتے ہوئے بلا سود قرضے حاصل کرنے والے پہلے 10 کاروباری افراد میں چیک تقسیم کر دیے۔

افتتاحی تقریب کے دوران، حکام نے اس اقدام کے بارے میں مزید تفصیلات فراہم کیں، جس کے لیے کل 5 ارب روپے مختص کیے گئے ہیں۔ پنجاب حکومت 5 کروڑ روپے تک کے قرضوں پر 1.456 ارب روپے کے سود کے اخراجات برداشت کرے گی۔

اس منصوبے میں قائدآباد میں 110 ایکڑ پر محیط پنک سالٹ پروسیسنگ زون بھی شامل ہے، جس میں 200 ویلیو ایڈیشن یونٹس قائم ہونے اور 10,000 سے زائد ملازمتیں پیدا ہونے کی توقع ہے۔ حکام کا اندازہ ہے کہ پنک سالٹ کی مصنوعات کی برانڈنگ اور ڈیولپمنٹ سے سالانہ برآمدات میں 300 ملین ڈالر تک کا اضافہ ہو سکتا ہے۔

وزیراعلیٰ پنجاب مریم نواز نے کہا ہے کہ پنک سالٹ کی صنعت کو فروغ دینے کے لیے 5 ارب روپے کی لاگت سے ایک خصوصی پروسیسنگ زون قائم کیا جا رہا ہے۔

لاہور میں ایک تقریب سے خطاب کرتے ہوئے انہوں نے کہا کہ یہ سہولت 110 ایکڑ اراضی پر تعمیر کی جائے گی اور توقع ہے کہ یہ تین سال میں مکمل ہو جائے گی۔ وزیراعلیٰ نے اس بات کا اعادہ کیا کہ اس کا مقصد اس بات کو یقینی بنانا ہے کہ پنک سالٹ کو ’’میڈ ان پاکستان‘‘ برانڈ کے تحت عالمی سطح پر فروخت کیا جائے، جس سے ملک کے زرمبادلہ کے ذخائر میں اضافہ ہوگا۔