محکمہ موسمیات کی بالائی پاکستان میں 5 ستمبر تک مزید بارشوں کی پیشگوئی

محکمہ موسمیات پاکستان (پی ایم ڈی) نے 29 اگست سے 5 ستمبر تک ملک کے بالائی علاقوں میں ہواؤں اور گرج چمک کے ساتھ بارش کی پیشگوئی کی ہے۔ صوبائی اور ضلعی حکام کو چوکس رہنے کا مشورہ دیا گیا ہے۔

محکمہ موسمیات کے مطابق، مون سون کی ہوائیں ملک کے بالائی علاقوں میں داخل ہو رہی ہیں، اور 31 اگست سے ایک مغربی لہر بھی متوقع ہے جو 5 ستمبر تک برقرار رہ سکتی ہے۔ اس سسٹم کے تحت کشمیر، اسلام آباد، راولپنڈی، مری، لاہور، سیالکوٹ، گوجرانوالہ اور خیبرپختونخوا و گلگت بلتستان کے مختلف اضلاع میں وقفے وقفے سے موسلادھار بارش کا امکان ہے۔

پی ایم ڈی نے ایک خصوصی وارننگ جاری کی ہے کہ 31 اگست سے 5 ستمبر تک اسلام آباد، راولپنڈی، مردان، صوابی، گوجرانوالہ، گجرات، سیالکوٹ اور لاہور کے نشیبی علاقوں میں شدید بارشوں سے شہری سیلاب کا خطرہ ہے۔ سندھ اور بلوچستان کے بیشتر حصوں میں موسم گرم اور مرطوب رہنے کی توقع ہے۔