فیلڈ مارشل عاصم منیر کی سعودی وزیر دفاع سے ملاقات، دفاعی تعاون جاری رکھنے کا عزم

سعودی عرب کے وزیر دفاع شہزادہ خالد بن سلمان نے مملکت پر حملوں کا مقابلہ کرنے کے لیے مشترکہ کوششیں جاری رکھنے کے عزم کا اعادہ کیا ہے۔ پاکستان کے چیف آف آرمی اسٹاف فیلڈ مارشل عاصم منیر سے ملاقات کے بعد سوشل میڈیا پلیٹ فارم 'ایکس' پر ایک پوسٹ میں سعودی وزیر نے کہا کہ انہوں نے مکہ معاہدے میں شامل ممالک کے فوجی سربراہان کے حالیہ اجلاس کے نتائج کو سراہا ہے۔

انہوں نے مزید کہا کہ بات چیت میں سعودی عرب میں شہری اور اقتصادی تنصیبات پر حالیہ حملوں کا معاملہ بھی شامل تھا۔

پاکستان کے چیف آف آرمی اسٹاف فیلڈ مارشل سید عاصم منیر اور سعودی وزیر دفاع خالد بن سلمان بن عبدالعزیز نے ریاض میں ملاقات کی جس میں سیکیورٹی کی صورتحال اور مکہ مکرمہ سمیت مملکت کی دیگر تنصیبات کو نشانہ بنانے والے حالیہ حملوں پر تبادلہ خیال کیا گیا۔

انٹر سروسز پبلک ریلیشنز (آئی ایس پی آر) کے ایک بیان کے مطابق، دونوں رہنماؤں نے مکہ مشترکہ دفاعی معاہدے کے فریم ورک کے تحت ان حملوں کا مقابلہ کرنے کے لیے مشترکہ کوششیں جاری رکھنے کی اہمیت پر زور دیا۔

ملاقات میں دفاعی معاہدے میں شریک ممالک کے چیفس آف اسٹاف کے حالیہ سہ فریقی اجلاس کے نتائج کو بھی سراہا گیا۔ بات چیت میں علاقائی سلامتی اور دوطرفہ دفاعی تعاون کے امور بھی شامل تھے۔

سعودی وفد میں وزیر مملکت ڈاکٹر مساعد بن محمد العیبان اور چیف آف جنرل اسٹاف لیفٹیننٹ جنرل فیاض بن حامد الرویلی سمیت دیگر حکام شامل تھے۔