ٹرمپ کی جانب سے آبنائے ہرمز کو امریکی علاقہ قرار دینے کے بعد ایران کا طنزیہ کیلیفورنیا پر دعویٰ

امریکی صدر ڈونلڈ ٹرمپ کی جانب سے آبنائے ہرمز کو امریکی علاقہ قرار دینے کے بیان پر طنزیہ جواب دیتے ہوئے ایران نے امریکی ریاست کیلیفورنیا کو ایرانی علاقہ قرار دے دیا ہے۔

بھارتی شہر حیدرآباد میں ایرانی قونصل خانے نے امریکا کا ایک نیا نقشہ جاری کیا، جس میں امریکی ریاست کیلیفورنیا کو اسلامی جمہوریہ ایران کا نیا علاقہ دکھایا گیا ہے۔ مائیگریشن پالیسی انسٹی ٹیوٹ کے مطابق، یہ اقدام کیلیفورنیا میں مقیم ایرانی نژاد افراد کی بڑی تعداد کی طرف اشارہ ہے، خاص طور پر لاس اینجلس میں، جسے کمیونٹی کی جانب سے غیر رسمی طور پر 'تہران جلس' بھی کہا جاتا ہے۔

ایران نے آبنائے ہرمز پر امریکی صدر ڈونلڈ ٹرمپ کے دعوے پر ردعمل دیتے ہوئے اسے 'وہم' قرار دے کر مسترد کر دیا ہے۔

رپورٹس کے مطابق، نائب ایرانی وزیر خارجہ کاظم غریب آبادی نے کہا کہ آبنائے سے متعلق ٹرمپ کا 'وہم' جلد ہی دور ہو جائے گا۔ انہوں نے مبینہ طور پر مزید کہا کہ 'وہم ختم ہو گا یا ہم اسے ختم کریں گے'۔