مری انتظامیہ نے یوم آزادی کی تیاریاں مکمل کر لیں، دفعہ 144 نافذ

مری میں ڈپٹی کمشنر آغا ظہیر عباس شیرازی کی زیر صدارت 14 اگست یوم آزادی کی تقریبات کے انتظامات کو حتمی شکل دینے کے لیے ایک اجلاس منعقد ہوا۔ ضلعی انتظامیہ اور متعلقہ محکموں کے افسران نے شرکت کی، جس میں سکیورٹی، ٹریفک پلان، صفائی ستھرائی، بجلی کی فراہمی، صحت اور ریسکیو سروسز کا جائزہ لیا گیا۔ فیصلہ کیا گیا کہ 14 اگست کو دفعہ 144 نافذ رہے گی، اور امن و امان برقرار رکھنے کے لیے خصوصی سکیورٹی اقدامات کیے جائیں گے۔ ریلیاں، سیمینارز، واکس اور دو سے تین مقامات پر آتش بازی کا اہتمام کیا جائے گا، جبکہ سرکاری و نیم سرکاری عمارتوں کو برقی قمقموں اور سبز ہلالی پرچموں سے سجایا جائے گا۔