کراچی کے تاجر میر رضا علی قتل کیس کی تحقیقات جاری

کراچی کے نوجوان تاجر میر رضا علی کی ہلاکت کی تحقیقات کرنے والی کمیٹی کو وسعت دے دی گئی ہے، جس میں اسسٹنٹ چیف سی پی ایل سی کاشف افتخار کو تکنیکی معاونت فراہم کرنے کے لیے شامل کیا گیا ہے۔ ابتدائی کمیٹی میں تین سینئر سپرنٹنڈنٹ آف پولیس (ایس ایس پیز) شامل تھے، جن میں ایس ایس پی ایس آئی یو سمیع اللہ سومرو، ایس ایس پی ایسٹ زبیر نذیر شیخ اور ایس ایس پی انویسٹی گیشن عثمان سدوزئی شامل ہیں۔ اب تک بارہ افراد کو تفتیش میں شامل کیا جا چکا ہے۔ حکام نے ایک اور سی سی ٹی وی ویڈیو بھی حاصل کی ہے جس میں مشکوک موٹر سائیکل سوار افراد کو جائے وقوعہ پر 20 سیکنڈ تک رکنے کے بعد جاتے ہوئے دیکھا جا سکتا ہے۔ پولیس نے ان افراد کی فہرست بھی مرتب کی ہے جن سے میر رضا علی اپنے آخری ایام میں رابطے میں تھا اور جن کا وہ مقروض تھا۔ کراچی پولیس چیف نے تصدیق کی ہے کہ کمیٹی تمام پہلوؤں سے تفتیش کر رہی ہے اور جلد ہی ملزمان کو گرفتار کر لیا جائے گا۔